O tión que tornó d’a dulza Franzia

En ista nobela que trascorre por os polius paraches d’a Onor i Marcuello, no existe muga entre o mundo reyal e o irreyal, entre ista esistenzia e o Dillá. Una compleganza de canabastas farchada por l’Onzeno conte i Ballangosta, falder e acabacasas, con casal pairal en o lugar de tellas soras, Toza d’Estopallo, trabucaire que fa o camín de San Chaime por mirar de conoxer a os trabucaires Tatón e Tartarula, que campan por a sierra i Marcuello, Charles Henry d’Alemañac, nople galo con a delera d’estar arqueologo, que tamién fundió en bita tot l’esquimen d’a parentalla, o tión rezién tornau d’a dulza Franzia, con ansias d’estar poeta d’estro, que torna enta o lugar de tellas soras zaga más de trenta añadas d’estar en París, o siñor Portugués, zerrino inamorau d’o zine muto, que campa carrillano de lugar en lugar fendo rular zintas d’os direutors de más nombrada d’o primotano zine muto, más o mosen cantamisano, con a baruca d’aparar a fe d’os fidels d’o lugar de tellas soras, farchan un quinteto de fenezius, que remeran e recontan punto por agulla lurs trapalas. Istos zinco personaches bi son redolaus d’atros personaches encara bibos, que campan por o lugar de tellas soras e o paisache d’a Onor i Marcuello.